ರಾಯಚೂರು: ಜಿಲ್ಲೆಯಲ್ಲಿ ಮಾದಕ ವಸ್ತುಗಳ ಜಾಲದ ವಿರುದ್ಧ ಸಮರ ಸಾರಿರುವ ಅಬಕಾರಿ ಇಲಾಖೆಯು ಭರ್ಜರಿ ಬೇಟೆಯಾಡಿದೆ. ಗುಪ್ತ ಮಾಹಿತಿ ಆಧರಿಸಿ ಮನೆಯೊಂದರ ಮೇಲೆ ದಾಳಿ ನಡೆಸಿದ ಅಧಿಕಾರಿಗಳ ತಂಡ, ಅಪಾರ ಪ್ರಮಾಣದ ಮಾದಕ ರಾಸಾಯನಿಕಗಳನ್ನು ವಶಪಡಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದೆ.
ಮೇ 1ರಂದು ರಾಯಚೂರು ವಲಯದ ಹೊಸ ಮಲಿಯಾಬಾದ ಗ್ರಾಮದ ಸರ್ಕಾರಿ ಪ್ರೌಢಶಾಲೆಯ ಬಳಿ ಅಬಕಾರಿ ಅಧಿಕಾರಿಗಳು ರಸ್ತೆಗಾವಲು ನಡೆಸುತ್ತಿದ್ದರು. ಈ ಸಂದರ್ಭದಲ್ಲಿ ಲಭಿಸಿದ ಖಚಿತ ಮಾಹಿತಿ ಮೇರೆಗೆ, ಬೆಳಿಗ್ಗೆ 10:30ಕ್ಕೆ ಗ್ರಾಮದ ನಿವಾಸಿ ಮಂಜುನಾಥ ತಂದೆ ಮಹಾದೇವಪ್ಪ ಗೌಡ ಎಂಬುವವರ ಮನೆಯ ಮೇಲೆ ಅಧಿಕಾರಿಗಳು ದಾಳಿ ನಡೆಸಿದರು.
ದಾಳಿಯ ವೇಳೆ ಮನೆಯಲ್ಲಿ ಅಕ್ರಮವಾಗಿ ಸಂಗ್ರಹಿಸಿಟ್ಟಿದ್ದ ಈ ಕೆಳಗಿನ ಅಪಾಯಕಾರಿ ರಾಸಾಯನಿಕಗಳು ಮತ್ತು ವಸ್ತುಗಳನ್ನು ಜಪ್ತಿ ಮಾಡಲಾಗಿದೆ:
ಅಲ್ಫಾಜೋಲಂ: 2.488 ಕೆ.ಜಿ
ಕ್ಲೋರೆಲ್ ಹೈಡ್ರೇಟ್: 1.100 ಕೆ.ಜಿ
ಸಿಟ್ರಿಕ್ ಆಸಿಡ್: 1.800 ಕೆ.ಜಿ
ವೈಟ್ ಪೇಸ್ಟ್: 1.700 ಕೆ.ಜಿ
ಸ್ಯಾಕ್ರೀನ್: 15 ಕೆ.ಜಿ
ಇದರೊಂದಿಗೆ ಕೃತ್ಯಕ್ಕೆ ಬಳಸುತ್ತಿದ್ದ ಹೀರೋ ಪ್ಲೆಸರ್ ದ್ವಿಚಕ್ರ ವಾಹನ ಹಾಗೂ ವಿವೋ ಸ್ಮಾರ್ಟ್ಫೋನ್ ಅನ್ನು ಅಧಿಕಾರಿಗಳು ವಶಕ್ಕೆ ಪಡೆದಿದ್ದಾರೆ.
ಈ ಸಂಬಂಧ ಆರೋಪಿಯ ವಿರುದ್ಧ ಕಲಬುರ್ಗಿ ವಿಭಾಗದ ಅಬಕಾರಿ ನಿರೀಕ್ಷಕ ನರೇಂದ್ರಕುಮಾರ್ ಅವರು NDPS ಕಾಯ್ದೆ 1985 ಹಾಗೂ ಕರ್ನಾಟಕ ಅಬಕಾರಿ ಕಾಯ್ದೆ 1965ರ ಅಡಿಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ. ಬಂಧಿತ ಆರೋಪಿಯನ್ನು ಸದ್ಯ ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಲಾಗಿದೆ.
ಬೆಳಗಾವಿ ಮತ್ತು ಕಲಬುರ್ಗಿ ವಿಭಾಗದ ಉನ್ನತ ಅಧಿಕಾರಿಗಳ ಮಾರ್ಗದರ್ಶನದಲ್ಲಿ, ರಾಯಚೂರು ಜಿಲ್ಲಾ ಅಬಕಾರಿ ಉಪ ಆಯುಕ್ತರ ನೇತೃತ್ವದಲ್ಲಿ ಈ ಕಾರ್ಯಾಚರಣೆ ನಡೆದಿದೆ. ತಂಡದಲ್ಲಿ ರಾಯಚೂರು ಮತ್ತು ಶಹಾಪುರ ವಲಯದ ಅಧಿಕಾರಿಗಳು ಹಾಗೂ ಸಿಬ್ಬಂದಿಗಳು ಪಾಲ್ಗೊಂಡಿದ್ದರು. ಅಬಕಾರಿ ಇಲಾಖೆಯ ಈ ದಿಟ್ಟ ಕ್ರಮವು ಜಿಲ್ಲೆಯ ಮಾದಕ ವ್ಯಸನಿಗಳ ಜಾಲಕ್ಕೆ ಮರಣಾಂತಿಕ ಪೆಟ್ಟು ನೀಡಿದಂತಾಗಿದೆ.
