ಬೆಂಗಳೂರು ಗ್ರಾಮಾಂತರ (ದೇವನಹಳ್ಳಿ): ಆಸ್ತಿಯ ವಿಚಾರವಾಗಿ ಹೆತ್ತ ತಂದೆ ಮತ್ತು ಒಡಹುಟ್ಟಿದವರೇ ಸೇರಿ ಅಸಹಾಯಕ ಮಹಿಳೆಯೊಬ್ಬಳ ಮೇಲೆ ಮಾರಕಾಸ್ತ್ರಗಳಿಂದ ಮಾರಣಾಂತಿಕ ಹಲ್ಲೆ ನಡೆಸಿರುವ ಅಮಾನವೀಯ ಘಟನೆ ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ದೇವನಹಳ್ಳಿ ತಾಲ್ಲೂಕಿನ ಬಚ್ಚಹಳ್ಳಿಯಲ್ಲಿ ನಡೆದಿದೆ.
ಹಲ್ಲೆಗೊಳಗಾದ ದುರ್ದೈವಿ ಮಹಿಳೆಯನ್ನು ಲಕ್ಷ್ಮಮ್ಮ ಎಂದು ಗುರುತಿಸಲಾಗಿದೆ. ಈ ಹಿಂದೆ ಲಕ್ಷ್ಮಮ್ಮ ಅವರಿಗೆ ಮಾನಸಿಕ ಅಸ್ವಸ್ಥನೊಬ್ಬನ ಜೊತೆ ವಿವಾಹ ಮಾಡಲಾಗಿತ್ತು. ಗಂಡನೊಂದಿಗೆ ಬದುಕಲು ಅಸಾಧ್ಯವಾದ ಪರಿಸ್ಥಿತಿ ನಿರ್ಮಾಣವಾದಾಗ, ತನ್ನ ಇಬ್ಬರು ಮಕ್ಕಳೊಂದಿಗೆ ತವರು ಮನೆಗೆ ಆಶ್ರಯ ಅರಸಿ ಬಂದಿದ್ದರು. ಆದರೆ, ಜನ್ಮ ನೀಡಿದ ತಂದೆ ಮುನಿಚಿನ್ನಪ್ಪ ಹಾಗೂ ಕುಟುಂಬಸ್ಥರು ಆಕೆಯನ್ನು ಮನೆಯೊಳಗೆ ಸೇರಿಸದೆ ಕನಿಷ್ಠ ಮಾನವೀಯತೆಯನ್ನೂ ತೋರದೆ ಕ್ರೂರವಾಗಿ ವರ್ತಿಸಿದ್ದರು.
ನಾಲ್ಕು ತಿಂಗಳಿಂದ ಕಾಂಪೌಂಡ್ನಲ್ಲೇ ವಾಸ: ಬೇರೆ ದಾರಿಯಿಲ್ಲದೆ ಲಕ್ಷ್ಮಮ್ಮ ಕಳೆದ ನಾಲ್ಕು ತಿಂಗಳಿನಿಂದ ತನ್ನ ಇಬ್ಬರು ಮಕ್ಕಳೊಂದಿಗೆ ತವರು ಮನೆಯ ಕಾಂಪೌಂಡ್ನಲ್ಲಿಯೇ ಆಶ್ರಯ ಪಡೆದಿದ್ದರು. ಬಿಸಿಲು, ಮಳೆ ಎನ್ನದೆ ಅಲ್ಲೇ ಸಣ್ಣದಾಗಿ ಅಡುಗೆ ಮಾಡಿಕೊಂಡು ಅತ್ಯಂತ ಕಷ್ಟಕರ ಜೀವನ ಸಾಗಿಸುತ್ತಿದ್ದರು.
ತವರು ಮನೆಯಲ್ಲಿ ಸೂಕ್ತ ಆಶ್ರಯ ಸಿಗದ ಹಿನ್ನೆಲೆಯಲ್ಲಿ, ತನ್ನ ಹಾಗೂ ತನ್ನ ಮಕ್ಕಳ ಭವಿಷ್ಯಕ್ಕಾಗಿ ಆಸ್ತಿಯಲ್ಲಿ ನ್ಯಾಯಬದ್ಧವಾಗಿ ತನಗೆ ಬರಬೇಕಾದ ಪಾಲನ್ನು ನೀಡುವಂತೆ ಲಕ್ಷ್ಮಮ್ಮ ಕೇಳಿದ್ದಾರೆ. ಮಗಳು ಹಕ್ಕು ಕೇಳುತ್ತಿದ್ದಂತೆ ತೀವ್ರವಾಗಿ ರೊಚ್ಚಿಗೆದ್ದ ತಂದೆ ಮುನಿಚಿನ್ನಪ್ಪ, ಆಕೆಯ ತಮ್ಮ ಮಾರಪ್ಪ ಹಾಗೂ ತಮ್ಮನ ಪತ್ನಿ ಅಶ್ವಿನಿ ಒಗ್ಗೂಡಿ ಲಕ್ಷ್ಮಮ್ಮ ಅವರ ಮೇಲೆ ಮಾರಕಾಸ್ತ್ರಗಳಿಂದ ಭೀಕರವಾಗಿ ಹಲ್ಲೆ ನಡೆಸಿದ್ದಾರೆ.
ಕುಟುಂಬಸ್ಥರೆಲ್ಲರೂ ಸೇರಿ ಅಸಹಾಯಕ ಮಹಿಳೆಯ ಮೇಲೆ ನಡೆಸಿದ ಈ ದಾರುಣ ದೌರ್ಜನ್ಯದ ದೃಶ್ಯಗಳು ಸ್ಥಳೀಯರ ಮೊಬೈಲ್ ಕ್ಯಾಮೆರಾಗಳಲ್ಲಿ ಸೆರೆಯಾಗಿವೆ.
ಈ ಅಮಾನವೀಯ ಘಟನೆಗೆ ಸಂಬಂಧಿಸಿದಂತೆ ಸದ್ಯ ವಿಶ್ವನಾಥಪುರ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ.
ಪ್ರಕರಣ ಕೈಗೆತ್ತಿಕೊಂಡಿರುವ ಪೊಲೀಸರು, ತಕ್ಷಣವೇ ಘಟನಾ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.
ಹಲ್ಲೆಗೈದ ಆರೋಪಿಗಳ ವಿರುದ್ಧ ಕಠಿಣ ಕಾನೂನು ಕ್ರಮ ಜರುಗಿಸಲು ಪೊಲೀಸರು ತನಿಖೆಯನ್ನು ಚುರುಕುಗೊಳಿಸಿದ್ದಾರೆ.
