ಬೆಂಗಳೂರು: ವೈಯಕ್ತಿಕ ದ್ವೇಷದ ಹಿನ್ನೆಲೆಯಲ್ಲಿ ವ್ಯಕ್ತಿಯೊಬ್ಬರನ್ನು ಕೊಲ್ಲುವ ಉದ್ದೇಶದಿಂದ ಕಳುಹಿಸಲಾಗಿದ್ದ ಪಾರ್ಸೆಲ್‌ನಲ್ಲಿ ಭೀಕರ ಐಇಡಿ (Improvised Explosive Device) ಸ್ಫೋಟ ಸಂಭವಿಸಿದ್ದು, ಪಾರ್ಸೆಲ್ ತೆರೆಯಲು ನೆರವಾಗಿದ್ದ ಉತ್ತರ ಪ್ರದೇಶ ಮೂಲದ ಅಮಾಯಕರೊಬ್ಬರು ಗಂಭೀರವಾಗಿ ಗಾಯಗೊಂಡಿರುವ ಘಟನೆ ನಗರದ ಪುಲಿಕೇಶಿ ನಗರದಲ್ಲಿ ನಡೆದಿದೆ.
ಅಕ್ಟೋಬರ್ 20 ರಂದು ಈ ದುರಂತ ಸಂಭವಿಸಿದ್ದು, ಉತ್ತರ ಪ್ರದೇಶದ ಗೋರಖ್‌ಪುರ ಮೂಲದ 28 ವರ್ಷದ ಸೂರಜ್ ಕುಮಾರ್ ಗಾಯಗೊಂಡ ದುರ್ದೈವಿ. ವೃತ್ತಿಯಲ್ಲಿ ಪೇಂಟರ್ ಆಗಿರುವ ಸೂರಜ್, ಸ್ಫೋಟಗೊಂಡ ನಿರ್ಮಾಣ ಹಂತದಲ್ಲಿರುವ ಕಟ್ಟಡದಲ್ಲೇ ತಮ್ಮ ಸಹೋದರನೊಂದಿಗೆ ವಾಸಿಸುತ್ತಿದ್ದರು. ಸ್ಫೋಟದ ತೀವ್ರತೆಗೆ ಸೂರಜ್ ಕುಮಾರ್ ಅವರ ಒಂದು ಕಣ್ಣಿನ ದೃಷ್ಟಿ ನಷ್ಟವಾಗಿದ್ದು, ಕೈ ಬೆರಳುಗಳು ಕತ್ತರಿಸಿಹೋಗಿವೆ. ಅಲ್ಲದೆ ದೇಹಕ್ಕೆ ಗಾಜಿನ ಹಾಗೂ ಲೋಹದ ಚೂರುಗಳು ತೂರಿಕೊಂಡಿದ್ದು, ಸುಟ್ಟಗಾಯಗಳಾಗಿವೆ. ಪ್ರಸ್ತುತ ಅವರು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದು, ಪ್ರಮುಖ ಅಂಗಾಂಗಗಳಿಗೆ ಯಾವುದೇ ಹಾನಿಯಾಗಿಲ್ಲ ಎಂದು ವೈದ್ಯರು ಸ್ಪಷ್ಟಪಡಿಸಿದ್ದಾರೆ.
ಘಟನೆಯ ವಿವರ:
ಅಕ್ಟೋಬರ್ 19 ರಂದು ಆರೋಪಿಗಳು ಸಣ್ಣ ಅಂಗಡಿಯೊಂದರ ಬಳಿ ಸ್ಫೋಟಕವಿದ್ದ ಪಾರ್ಸೆಲ್ ಇಟ್ಟು, 53 ವರ್ಷದ ಅಲ್ಲಾವುದ್ದೀನ್ ಎಂಬುವವರಿಗೆ ಕರೆ ಮಾಡಿ ಅದನ್ನು ತೆಗೆದುಕೊಂಡು ಹೋಗುವಂತೆ ತಿಳಿಸಿದ್ದರು. ಫೋನ್‌ನಲ್ಲಿ ಮಾತನಾಡಿದ ವ್ಯಕ್ತಿ ಹಿಂದಿಯಲ್ಲಿ ಮಾತನಾಡಿದ್ದು, ಹಿಂದಿ ತಿಳಿಯದ ಅಲ್ಲಾವುದ್ದೀನ್ ಕೇವಲ ‘ಪಾರ್ಸೆಲ್’ ಮತ್ತು ‘ಅಂಗಡಿ’ ಎಂಬ ಪದಗಳನ್ನು ಗ್ರಹಿಸಿ ಪಾರ್ಸೆಲ್ ಅನ್ನು ಪಡೆದುಕೊಂಡಿದ್ದರು. ಕಟ್ಟಡದ ಮಾಲೀಕರು ಹಾಗೂ ಇತರ ಕೆಲಸಗಾರರನ್ನು ವಿಚಾರಿಸಿದರೂ ಯಾರೂ ಪಾರ್ಸೆಲ್ ತಮ್ಮದಲ್ಲ ಎಂದಿದ್ದರಿಂದ ಅದನ್ನು ಕಟ್ಟಡದ ಒಳಗಿರಿಸಿದ್ದರು.
ಮರುದಿನ (ಅಕ್ಟೋಬರ್ 20), ಆರೋಪಿಗಳು ಅಲ್ಲಾವುದ್ದೀನ್‌ಗೆ ಪದೇ ಪದೇ ಕರೆ ಮಾಡಿ ಪಾರ್ಸೆಲ್ ತೆರೆಯುವಂತೆ ಒತ್ತಾಯಿಸಿದ್ದಾರೆ. ಹಿಂದಿ ಭಾಷೆ ಸರಿಯಾಗಿ ಅರ್ಥವಾಗದ ಕಾರಣ ಅಲ್ಲಾವುದ್ದೀನ್, ಹಿಂದಿ ಭಾಷೆ ಬಲ್ಲ ಪೇಂಟರ್ ಸೂರಜ್ ಕುಮಾರ್‌ಗೆ ಫೋನ್ ನೀಡಿದ್ದಾರೆ. ಆರೋಪಿಗಳು ಕರೆ ಮೂಲಕ ಸೂರಜ್‌ಗೆ ಪಾರ್ಸೆಲ್ ತೆರೆಯಲು ಸೂಚನೆ ನೀಡಿದ್ದಾರೆ. ಸೂರಜ್ ಸೂಚನೆಯಂತೆ ಪಾರ್ಸೆಲ್‌ನಲ್ಲಿದ್ದ ಬಟನ್ ಒತ್ತುತ್ತಿದ್ದಂತೆಯೇ ಭಾರಿ ಪ್ರಮಾಣದ ಸ್ಫೋಟ ಸಂಭವಿಸಿದೆ.
ಆರೋಪಿಗಳು ಅಲ್ಲಾವುದ್ದೀನ್ ಅವರಿಗೆ ತಮ್ಮ ಗುರುತು ಸಿಗಬಾರದೆಂಬ ಕಾರಣಕ್ಕೆ ತಮ್ಮ ಸ್ಥಳೀಯ ಉಪಭಾಷೆಯಾದ ‘ಸಿಲ್ಹೆಟಿ’ (Sylheti) ಭಾಷೆಯನ್ನು ಬಳಸದೆ ಹಿಂದಿಯಲ್ಲಿ ಮಾತನಾಡಿದ್ದರು ಎಂದು ಮೂಲಗಳು ತಿಳಿಸಿವೆ. ಘಟನೆ ಕುರಿತು ಪುಲಿಕೇಶಿ ನಗರ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ತನಿಖೆ ಚುರುಕುಗೊಳಿಸಿದ್ದಾರೆ.
