ದಾವಣಗೆರೆ: ಆನ್‌ಲೈನ್ ಗೇಮ್ ವ್ಯಸನಕ್ಕೆ ಬಲಿಯಾಗಿ 8ನೇ ತರಗತಿಯ 13 ವರ್ಷದ ಬಾಲಕನೊಬ್ಬ ಲಕ್ಷಾಂತರ ರೂ. ಕಳೆದುಕೊಂಡು ಮನನೊಂದು ಆತ್ಮಹತ್ಯೆ ಮಾಡಿಕೊಂಡಿರುವ ಅತ್ಯಂತ ದಾರುಣ ಘಟನೆ ದಾವಣಗೆರೆ ಜಿಲ್ಲೆಯಲ್ಲಿ ವರದಿಯಾಗಿದೆ.
ಘಟನೆಯ ವಿವರ:
ಟಿ.ಆರ್. ಮನೋಜ್ ಪ್ರಾಣಾಪಾಯ ತಂದೊಡ್ಡುವ ‘ಫ್ರೀ ಫೈರ್’ (Free Fire) ಆನ್‌ಲೈನ್ ಗೇಮ್ ಆಡುವ ಚಟಕ್ಕೆ ಸಂಪೂರ್ಣವಾಗಿ ಬಿದ್ದಿದ್ದನು. ಆಟದ ಹಪಾಹಪಿಗೆ ಬಿದ್ದ ಬಾಲಕ, ಮನೆಯಲ್ಲಿ ಯಾರಿಗೂ ತಿಳಿಯದಂತೆ ಹಣ ತೆಗೆದು ಗೇಮ್‌ಗಾಗಿ ಖರ್ಚು ಮಾಡಿದ್ದು, ಒಟ್ಟು ರೂ. 4,11,000 ಹಣವನ್ನು ಕಳೆದುಕೊಂಡಿದ್ದನು.
ಮಾನಸಿಕ ಒತ್ತಡ ಹಾಗೂ ಆತಂಕ:
ಗೇಮ್‌ಗಾಗಿ ದೊಡ್ಡ ಮೊತ್ತದ ಹಣ ಕಳೆದುಕೊಂಡಿರುವುದು ಮತ್ತು ತಂದೆ-ಮನೆಯವರಿಗೆ ಈ ವಿಚಾರ ತಿಳಿದರೆ ಎಂಬ ಆತಂಕದಿಂದ ಬಾಲಕ ತೀವ್ರ ಮಾನಸಿಕ ಒತ್ತಡ ಹಾಗೂ ಖಿನ್ನತೆಗೆ ಒಳಗಾಗಿದ್ದನು. ಕೊನೆಗೆ ನೊಂದ ಬಾಲಕ ಕೃತ್ಯವೆಸೆದಿದ್ದು, ಈ ದುರ್ಘಟನೆ ಪೋಷಕರಲ್ಲಿ ಹಾಗೂ ಸ್ಥಳೀಯರಲ್ಲಿ ತೀವ್ರ ಆಘಾತ ಮೂಡಿಸಿದೆ.
ಪೋಷಕರಿಗೆ ಎಚ್ಚರಿಕೆ ಹಾಗೂ ಸಂದೇಶ:
ಇಂದಿನ ದಿನಗಳಲ್ಲಿ ಮೊಬೈಲ್ ಮತ್ತು ಆನ್‌ಲೈನ್ ಗೇಮ್‌ಗಳ ಅತಿಯಾದ ಬಳಕೆಯು ಎಳೆಮಕ್ಕಳ ಜೀವನದ ಮೇಲೆ ಎಂತಹ ದುಷ್ಪರಿಣಾಮ ಬೀರುತ್ತಿದೆ ಎಂಬುದಕ್ಕೆ ಈ ಘಟನೆ ಕಣ್ಣೀರಿನ ಉದಾಹರಣೆಯಾಗಿದೆ. ಪೋಷಕರು ತಮ್ಮ ಮಕ್ಕಳು ಮೊಬೈಲ್‌ನಲ್ಲಿ ಏನ್ ಮಾಡುತ್ತಿದ್ದಾರೆ, ಯಾವ ಗೇಮ್‌ಗಳನ್ನು ಆಡುತ್ತಿದ್ದಾರೆ ಮತ್ತು ಆನ್‌ಲೈನ್ ಹಣಕಾಸು ವ್ಯವಹಾರಗಳ ಚಟುವಟಿಕೆಗಳ ಮೇಲಿನ ನಿಗಾವನ್ನು ಕಡ್ಡಾಯವಾಗಿ ವಹಿಸಬೇಕು. ಒಂದು ವೇಳೆ ಮಕ್ಕಳು ತಪ್ಪು ದಾರಿಯಲ್ಲಿದ್ದರೆ ಅಥವಾ ಮಾನಸಿಕ ಒತ್ತಡದಲ್ಲಿದ್ದರೆ, ಅವರನ್ನು ಕೇವಲ ಗದರಿಸುವ ಬದಲು ಪ್ರೀತಿಯಿಂದ ಅವರ ಸಮಸ್ಯೆಗಳನ್ನು ಆಲಿಸಿ ಸರಿಪಡಿಸುವ ಹಾಗೂ ಸೂಕ್ತ ಮಾರ್ಗದರ್ಶನ ನೀಡುವ ಜವಾಬ್ದಾರಿ ಪ್ರತಿಯೊಬ್ಬ ಪೋಷಕರ ಮೇಲಿದೆ.
