ಆನೇಕಲ್: ಪ್ರಕೃತಿ ಪ್ರೇಮಿಗಳ ನೆಚ್ಚಿನ ತಾಣವಾದ ಬನ್ನೇರುಘಟ್ಟ ಜೈವಿಕ ಉದ್ಯಾನವನದಲ್ಲಿ ಈಗ ಹೊಸ ಅತಿಥಿಗಳ ಕಲರವ ಶುರುವಾಗಿದೆ. ಉದ್ಯಾನದ ಹೆಣ್ಣು ಜೀಬ್ರಾಗಳಾದ ‘ಕಾವೇರಿ’ ಮತ್ತು ‘ಕೋಕಿಲ’ ಎರಡು ಮುದ್ದಾದ ಹೆಣ್ಣು ಮರಿಗಳಿಗೆ ಜನ್ಮ ನೀಡಿದ್ದು, ಪ್ರಾಣಿ ಪ್ರಿಯರಲ್ಲಿ ಸಂತಸ ಮೂಡಿಸಿದೆ.
ಕಳೆದ ಜನವರಿ ತಿಂಗಳಲ್ಲಿ ಈ ಎರಡು ಜೀಬ್ರಾಗಳು ಮರಿ ಹಾಕಿದ್ದು, ಉದ್ಯಾನದ ಸಿಬ್ಬಂದಿ ಮತ್ತು ವೈದ್ಯರು ಇವುಗಳ ಮೇಲೆ ವಿಶೇಷ ನಿಗಾ ವಹಿಸಿದ್ದಾರೆ.
ಜನೆವರಿ 17: ‘ಕೋಕಿಲ’ ಎಂಬ ಜೀಬ್ರಾ ಹೆಣ್ಣು ಮರಿಗೆ ಜನ್ಮ ನೀಡಿತು.
ಜನೆವರಿ 28: ‘ಕಾವೇರಿ’ ಎಂಬ ಜೀಬ್ರಾ ಮತ್ತೊಂದು ಹೆಣ್ಣು ಮರಿಗೆ ಜನ್ಮ ನೀಡಿತು.
ಈ ಎರಡು ಹೊಸ ಅತಿಥಿಗಳ ಸೇರ್ಪಡೆಯೊಂದಿಗೆ ಬನ್ನೇರುಘಟ್ಟ ಉದ್ಯಾನದಲ್ಲಿರುವ ಒಟ್ಟು ಜೀಬ್ರಾಗಳ ಸಂಖ್ಯೆ ಈಗ 9ಕ್ಕೆ ಏರಿಕೆಯಾಗಿದೆ.
ಹೊಸ ಮರಿಗಳು ಮತ್ತು ತಾಯಿ ಜೀಬ್ರಾಗಳು ಸಂಪೂರ್ಣ ಆರೋಗ್ಯವಾಗಿದ್ದು, ಅತ್ಯಂತ ಉತ್ಸಾಹದಿಂದ ಇವೆ. ಮರಿಗಳ ತುಂಟಾಟವು ಉದ್ಯಾನದ ಸಿಬ್ಬಂದಿಯನ್ನು ಆಕರ್ಷಿಸುತ್ತಿದೆ. ಈ ಕುರಿತು ಮಾಹಿತಿ ನೀಡಿದ ಜೈವಿಕ ಉದ್ಯಾನದ ಕಾರ್ಯನಿರ್ವಾಹಕ ನಿರ್ದೇಶಕ ಸೂರ್ಯಸೇನ್ ಅವರು, “ವೈದ್ಯಾಧಿಕಾರಿಗಳು ಮತ್ತು ಉದ್ಯಾನದ ಸಿಬ್ಬಂದಿ ಮರಿಗಳ ಆರೋಗ್ಯದ ಬಗ್ಗೆ ನಿರಂತರ ಗಮನ ಹರಿಸುತ್ತಿದ್ದಾರೆ. ಸದ್ಯಕ್ಕೆ ಅವುಗಳನ್ನು ಅತ್ಯಂತ ಜತನದಿಂದ ನೋಡಿಕೊಳ್ಳಲಾಗುತ್ತಿದೆ,” ಎಂದು ತಿಳಿಸಿದ್ದಾರೆ.
ಬನ್ನೇರುಘಟ್ಟದ ಸಫಾರಿಯಲ್ಲಿ ಇನ್ನು ಮುಂದೆ ಪ್ರವಾಸಿಗರು ಈ ಪುಟ್ಟ ಜೀಬ್ರಾಗಳ ಆಟವನ್ನು ಕಣ್ತುಂಬಿಕೊಳ್ಳಬಹುದಾಗಿದೆ. ವಂಶಾಭಿವೃದ್ಧಿ ಪ್ರಕ್ರಿಯೆಯು ಯಶಸ್ವಿಯಾಗಿ ನಡೆಯುತ್ತಿರುವುದು ಉದ್ಯಾನದ ನಿರ್ವಹಣೆಗೆ ಸಂದ ಜಯವಾಗಿದೆ ಎಂದು ಪ್ರಾಣಿ ಸಂಗ್ರಹಾಲಯದ ಅಧಿಕಾರಿಗಳು ಹರ್ಷ ವ್ಯಕ್ತಪಡಿಸಿದ್ದಾರೆ.
