ಬೆಂಗಳೂರು: ಕೋಟಿ ಕೋಟಿ ಜನರ ಆಶ್ರಯ ತಾಣ, ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ ದಿನಕ್ಕೊಂದು ವಿಚಿತ್ರ ಸುದ್ದಿಗಳು ಕೇಳಿಬರುತ್ತಿರುತ್ತವೆ. ಆದರೆ, ನಗರದ ಅತ್ಯಂತ ಜನನಿಬಿಡ ಪ್ರದೇಶವಾದ ಜಾಲಹಳ್ಳಿ ಕ್ರಾಸ್ ಹತ್ತಿರ ಇತ್ತೀಚೆಗೆ ಬೆಳಕಿಗೆ ಬಂದಿರುವ ಘಟನೆಯೊಂದು ಇಡೀ ರಾಜಧಾನಿಯ ಜನರನ್ನು ಮಾತ್ರವಲ್ಲದೆ, ಬಿಬಿಎಂಪಿ ಹಾಗೂ ಪೊಲೀಸ್ ಇಲಾಖೆಯನ್ನೇ ಬೆಚ್ಚಿಬೀಳಿಸಿದೆ. ಸದಾ ಸಾವಿರಾರು ವಾಹನಗಳು ಸಂಚರಿಸುವ ಬೃಹತ್ ಮೇಲ್ಸೇತುವೆಯ (Flyover) ಪಿಲ್ಲರ್ ಒಂದರ ಕಾಂಕ್ರೀಟ್ ಒಳಗಿರುವ ಕಿರಿದಾದ ನಿಷೇಧಿತ ಜಾಗದಲ್ಲಿ ವ್ಯಕ್ತಿಯೊಬ್ಬ ದಿನಗಟ್ಟಲೆ ವಾಸಿಸುತ್ತಿದ್ದ ಆಘಾತಕಾರಿ ಸತ್ಯ ಬಯಲಾಗಿದೆ.
ಫ್ಲೈಓವರ್ ಪಿಲ್ಲರ್ ಒಳಗಿನ ಸಣ್ಣ ಗ್ಯಾಪ್ನಲ್ಲಿ ಮನುಷ್ಯನೊಬ್ಬ ಮಲಗಿರುವುದನ್ನು ಕಂಡ ಸಾರ್ವಜನಿಕರು ಹಾಗೂ ಅಧಿಕಾರಿಗಳು ದೆವ್ವ ನೋಡಿದವರಂತೆ ಆಶ್ಚರ್ಯಚಕಿತರಾಗಿದ್ದಾರೆ. ಈ ವಿಚಿತ್ರ ದೃಶ್ಯವನ್ನು ಕಣ್ಣಾರೆ ವೀಕ್ಷಿಸಲು ಜಾಲಹಳ್ಳಿ ಕ್ರಾಸ್ ಬಳಿ ನೂರಾರು ಸಾರ್ವಜನಿಕರು ಮುಗಿಬಿದ್ದಿದ್ದರು.
ಪಿಲ್ಲರ್ ಒಳಗಡೆ ರಹಸ್ಯವಾಗಿ ನೆಲೆಸಿದ್ದ ವ್ಯಕ್ತಿಯನ್ನು ಮೂಲತಃ ಕಲ್ಬುರ್ಗಿ ಜಿಲ್ಲೆಯ ಆಳಂದ ತಾಲೂಕಿನ ನಿವಾಸಿ ರಂಗನಾಥ್ (38) ಎಂದು ಗುರುತಿಸಲಾಗಿದೆ. ಈತ ಬೆಂಗಳೂರಿಗೆ ಕೆಲಸ ಹುಡುಕಿಕೊಂಡು ಬಂದು, ಉಳಿದುಕೊಳ್ಳಲು ಸರಿಯಾದ ಆಶ್ರಯವಿಲ್ಲದೆ ಅಲೆದಾಡುತ್ತಿದ್ದ ಅನಾಥ ಹಮಾಲಿ ಕಾರ್ಮಿಕನಾಗಿದ್ದಾನೆ ಎಂದು ತಿಳಿದುಬಂದಿದೆ.
ಫ್ಲೈಓವರ್ನ ಆ ಪಿಲ್ಲರ್ನ ಜಾಗಕ್ಕೆ ಹೋಗಲು ಯಾವುದೇ ಏಣಿ ಅಥವಾ ದಾರ ಇರಲಿಲ್ಲ. ಆದರೆ, ಈ ರಂಗನಾಥ್ ಹತ್ತಿರದಲ್ಲೇ ಇದ್ದ ಮೆಟ್ರೋ ಪಿಲ್ಲರ್ ಅಥವಾ ಫ್ಲೈಓವರ್ನ ಬದಿಯ ಪೈಪ್ಗಳು ಹಾಗೂ ಕಾಂಕ್ರೀಟ್ ಗೋಡೆಯ ಸಣ್ಣ ಸಣ್ಣ ಆಸರೆಗಳನ್ನು ಹಿಡಿದುಕೊಂಡು, ಸರ್ಕಸ್ ಪಟುಗಳಂತೆ ತೂಗಾಡುತ್ತಾ ಆ ನಿಷೇಧಿತ ಜಾಗದ ಒಳಗಡೆ ನುಸುಳುತ್ತಿದ್ದನು ಎನ್ನಲಾಗಿದೆ. ರಾತ್ರಿ ಇಡೀ ನಗರದ ವಿವಿಧೆಡೆ ಹಮಾಲಿ ಅಥವಾ ಕೂಲಿ ಕೆಲಸ ಮುಗಿಸಿ, ಮುಂಜಾನೆ ಯಾರ ಕಣ್ಣಿಗೂ ಬೀಳದಂತೆ ಸದ್ದಿಲ್ಲದೆ ಆ ಪಿಲ್ಲರ್ ಒಳಗಡೆ ಹೋಗಿ ಹಾಯಾಗಿ ಮಲಗಿಕೊಳ್ಳುತ್ತಿದ್ದನು. ಸಂಜೆಯಾಗುತ್ತಿದ್ದಂತೆ ಮತ್ತೆ ಕೆಳಗೆ ಇಳಿದು ಬರುತ್ತಿದ್ದನು ಎಂದು ಪ್ರತ್ಯಕ್ಷದರ್ಶಿಗಳು ಬಾಯಿ ಮೇಲೆ ಬೆರಳಿಟ್ಟಿದ್ದಾರೆ.
ಫ್ಲೈಓವರ್ಗಳ ನಿರ್ಮಾಣದ ಸಮಯದಲ್ಲಿ ಪಿಲ್ಲರ್ಗಳ ನಡುವೆ ತಾಂತ್ರಿಕ ಕಾರಣಗಳಿಗಾಗಿ ಬಿಡಲಾಗುವ ‘ಎಕ್ಸ್ಪಾನ್ಷನ್ ಗ್ಯಾಪ್’ (Expansion Gap) ಇದಾಗಿತ್ತು. ಕಳೆದ ವಾರ ಮಧ್ಯಾಹ್ನ ಬಿಸಿಲು ಹೆಚ್ಚಾಗಿದ್ದಾಗ, ಫ್ಲೈಓವರ್ ಕೆಳಗೆ ನಿಂತಿದ್ದ ಸಾರ್ವಜನಿಕರೊಬ್ಬರು ಆಕಸ್ಮಿಕವಾಗಿ ಮೇಲಕ್ಕೆ ನೋಡಿದಾಗ ಪಿಲ್ಲರ್ ಒಳಗಿನ ಕತ್ತಲ ಜಾಗದಲ್ಲಿ ಯಾರೋ ಮಲಗಿರುವಂತೆ ಕಾಲಿನ ಬೆರಳುಗಳು ಕಾಣಿಸಿವೆ. ಅನುಮಾನಗೊಂಡು ಸರಿಯಾಗಿ ಗಮನಿಸಿದಾಗ ಅಲ್ಲಿ ಮನುಷ್ಯನೊಬ್ಬ ಆರಾಮವಾಗಿ ಮಲಗಿರುವುದು ಪತ್ತೆಯಾಗಿದೆ. ವಿಚಿತ್ರವೆಂದರೆ, ಹೊರಗಡೆ ಜನರೆಲ್ಲಾ ಗುಂಪು ಕೂಡಿ ಇವನನ್ನೇ ನೋಡ್ತಿದ್ದಾರೆ, ಮೊಬೈಲ್ನಲ್ಲಿ ವೀಡಿಯೋ ಮಾಡ್ತಿದ್ದಾರೆ ಅನ್ನೋದು ಅವನಿಗೇ ಗೊತ್ತಿಲ್ಲದ ಹಾಗೆ ತನ್ಮಯತೆಯಿಂದ ನಿದ್ರಿಸುತ್ತಿದ್ದ!
ಭದ್ರತೆಗೆ ಬಿದ್ದ ದೊಡ್ಡ ಕನ್ನ: ಇಷ್ಟೊಂದು ಬೃಹತ್ ಮೇಲ್ಸೇತುವೆಯ ಅತ್ಯಂತ ಸೂಕ್ಷ್ಮ ಮತ್ತು ನಿಷೇಧಿತ ಜಾಗಕ್ಕೆ ಯಾರ ಕಣ್ಣಿಗೂ ಬೀಳದೆ ಒಬ್ಬ ವ್ಯಕ್ತಿ ದಿನಗಟ್ಟಲೆ ಹೋಗಿ ಇರಲು ಹೇಗೆ ಸಾಧ್ಯವಾಯಿತು? ನಾಳೆ ದಿನ ಯಾರಾದರೂ ಕಿಡಿಗೇಡಿಗಳು ಇಂತಹ ಜಾಗಗಳನ್ನು ಬಳಸಿಕೊಂಡು ವಿಧ್ವಂಸಕ ಕೃತ್ಯ ಎಸಗಿದರೆ ಗತಿ ಏನು? ನಮ್ಮ ಭದ್ರತಾ ವ್ಯವಸ್ಥೆ ಎಷ್ಟರಮಟ್ಟಿಗಿದೆ ಎಂಬ ಗಂಭೀರ ಪ್ರಶ್ನೆ ಮೂಡುತ್ತದೆ.
ಮೆಟ್ರೋ ಸಿಟಿಯ ಕಹಿ ಸತ್ಯ: ಬೆಂಗಳೂರಿನಲ್ಲಿ ಕೋಟಿ ಕೋಟಿ ಹಣ ಗಳಿಸುವವರಿದ್ದಾರೆ. ಆದರೆ ಅದೇ ಸಿಟಿಯಲ್ಲಿ ರಾತ್ರಿ ಮಲಗಲು ಒಂದು ಸಣ್ಣ ಸೂರಿಲ್ಲದೆ, ಪ್ರಾಣದ ಹಂಗು ತೊರೆದು ಫ್ಲೈಓವರ್ ಪಿಲ್ಲರ್ ಒಳಗಡೆ ಮಲಗುವಂತಹ ಪರಿಸ್ಥಿತಿಯಲ್ಲಿ ಬಡ ಕಾರ್ಮಿಕರಿದ್ದಾರೆ ಎನ್ನುವುದು ನಮ್ಮ ಸಾಮಾಜಿಕ ವ್ಯವಸ್ಥೆಗೆ ಹಿಡಿದ ಕನ್ನಡಿಯಾಗಿದೆ.
ಬಿಬಿಎಂಪಿ ಮತ್ತು ಪೊಲೀಸರ ನಿರ್ಲಕ್ಷ್ಯ: ಹಗಲು ರಾತ್ರಿ ಸದಾ ಟ್ರಾಫಿಕ್ ಪೊಲೀಸರು ಓಡಾಡುವ, ಸಾವಿರಾರು ಜನ ಸಂಚರಿಸುವ ಜಾಲಹಳ್ಳಿ ಕ್ರಾಸ್ನಂತಹ ಜಾಗದಲ್ಲೇ ಈ ಘಟನೆ ನಡೆದಿದೆ ಎಂದರೆ, ಇಲಾಖೆಗಳ ನಿರಂತರ ಪರಿಶೀಲನೆ ಹಾಗೂ ನಿರ್ವಹಣೆ (Maintenance & Inspection) ಎಷ್ಟು ಕಳಪೆಯಾಗಿದೆ ಎಂಬುದು ಸಾಬೀತಾಗುತ್ತದೆ.
ಘಟನಾ ಸ್ಥಳಕ್ಕೆ ಬಂದ ಪೊಲೀಸರು ಮತ್ತು ಅಗ್ನಿಶಾಮಕ ಸಿಬ್ಬಂದಿ ಆ ವ್ಯಕ್ತಿಯನ್ನು ಸುರಕ್ಷಿತವಾಗಿ ಕೆಳಗೆ ಇಳಿಸಿ, ವಿಚಾರಣೆ ನಡೆಸಿ ಎಚ್ಚರಿಕೆ ನೀಡಿ ಕಳುಹಿಸಿದ್ದಾರೆ. ಅಲ್ಲದೆ, ಬಿಬಿಎಂಪಿ ಅಧಿಕಾರಿಗಳು ತಕ್ಷಣವೇ ಎಚ್ಚೆತ್ತುಕೊಂಡು ಆ ಪಿಲ್ಲರ್ನ ಖಾಲಿ ಜಾಗಕ್ಕೆ ಕಬ್ಬಿಣದ ಜಾಲರಿ (Mesh) ಅಳವಡಿಸಿ ಸಂಪೂರ್ಣವಾಗಿ ಬಂದ್ ಮಾಡಿದ್ದಾರೆ. ಇನ್ಮುಂದೆಯಾದರೂ ಅಧಿಕಾರಿಗಳು ಎಚ್ಚೆತ್ತುಕೊಂಡು ನಗರದ ಎಲ್ಲಾ ಫ್ಲೈಓವರ್ಗಳ ಇಂತಹ ಖಾಲಿ ಜಾಗಗಳನ್ನು ಪರಿಶೀಲಿಸಿ, ಅವುಗಳನ್ನು ಸುರಕ್ಷಿತವಾಗಿ ಲಾಕ್ ಮಾಡಬೇಕಾಗಿದೆ ಎಂದು ಸಾರ್ವಜನಿಕರು ಆಗ್ರಹಿಸಿದ್ದಾರೆ.
ವರದಿ :- ಗಿಲ್ಬರ್ಟ್. ಜೆ
