ಬೆಂಗಳೂರು: ಕೆಆರ್ ಪುರಂ ವ್ಯಾಪ್ತಿಯಲ್ಲಿ ಚೈನೀಸ್ ಮಾಂಜಾ ದಾರದಿಂದಾಗಿ ಸವಾರೆಯೊಬ್ಬರ ಬೆರಳುಗಳು ಕತ್ತರಿಸಿ, ಕುತ್ತಿಗೆಗೆ ಗಾಯವಾಗಿ ನಡುರಸ್ತೆಯಲ್ಲೇ ಬಿದ್ದ ಭೀಕರ ಘಟನೆ ನಡೆದಿದೆ. ಸ್ಥಳೀಯರ ಸಮಯಪ್ರಜ್ಞೆಯಿಂದ ಮಹಿಳೆಯನ್ನು ತಕ್ಷಣವೇ ಆಸ್ಪತ್ರೆಗೆ ಸೇರಿಸಿ ಪ್ರಾಣ ರಕ್ಷಿಸಲಾಗಿದೆ.
ಘಟನೆಯ ವಿವರ:
ಮಹಿಳೆಯೊಬ್ಬರು ಆಕ್ಟಿವಾ (Activa) ಬೈಕ್‌ನಲ್ಲಿ ತೆರಳುತ್ತಿದ್ದಾಗ ಇದ್ದಕ್ಕಿದ್ದಂತೆ ಗಾಳಿಪಟದ ಚೈನೀಸ್ ಮಾಂಜಾ ದಾರ ಕುತ್ತಿಗೆ ಹಾಗೂ ಕೈಬೆರಳುಗಳಿಗೆ ಸಿಕ್ಕಿಹಾಕಿಕೊಂಡಿದೆ.
ಸ್ಥಳದಲ್ಲೇ ಪ್ರಥಮ ಚಿಕಿತ್ಸೆ: ಮಾಂಜಾ ಹರಿತವಾಗಿದ್ದರಿಂದ ಕ್ಷಣಾರ್ಧದಲ್ಲೇ ಬೆರಳುಗಳು ಕತ್ತರಿಸಿ, ಕುತ್ತಿಗೆಗೆ ಗಾಯವಾಗಿ ಮಹಿಳೆ ಗಾಡಿ ಸಮೇತ ಕೆಳಗೆ ಬಿದ್ದಿದ್ದಾರೆ. ರಕ್ತಸ್ರಾವದಿಂದ ತೀವ್ರ ನೋವಿನಲ್ಲಿದ್ದ ಮಹಿಳೆಗೆ ಸ್ಥಳದಲ್ಲಿದ್ದ ಸಾರ್ವಜನಿಕರು ತಕ್ಷಣವೇ ಪ್ರಥಮ ಚಿಕಿತ್ಸೆ ನೀಡಿ, ಅವರ ಮೊಬೈಲ್‌ನಿಂದ ಪತಿ ಹಾಗೂ ಸ್ನೇಹಿತರಿಗೆ ಕರೆ ಮಾಡಿ ಮಾಹಿತಿ ನೀಡಿದ್ದಾರೆ.
ಆಸ್ಪತ್ರೆಗೆ ದಾಖಲು: ತಕ್ಷಣ ಸ್ಥಳಕ್ಕೆ ಬಂದ ಸ್ನೇಹಿತ ಹಾಗೂ ಸಾರ್ವಜನಿಕರು ಸೇರಿ ಗಾಯಾಳು ಮಹಿಳೆಯನ್ನು ಆಟೋದಲ್ಲಿ ಕೆಆರ್ ಪುರಂನ ಶ್ರೀರಾಮ್ ಆಸ್ಪತ್ರೆಗೆ ದಾಖಲಿಸಿ ತುರ್ತು ಚಿಕಿತ್ಸೆ ಕೊಡಿಸಿದ್ದಾರೆ.
ಖಾತಿಯಾದ ‘ಚೈನೀಸ್ ಮಾಂಜಾ’ ಬಗ್ಗೆ ಕಟ್ಟುನಿಟ್ಟಿನ ಜಾಗೃತಿ ಮನವಿ:
ಚೈನೀಸ್ ಮಾಂಜಾ ದಾರವು ಕಣ್ಣಿಗೆ ಕಾಣಿಸುವುದಿಲ್ಲ, ಆದರೆ ಬ್ಲೇಡ್‌ಗಿಂತಲೂ ಅಪಾಯಕಾರಿಯಾದ ಹರಿತವನ್ನು ಹೊಂದಿದೆ. ಇದು ಪ್ರಾಣಾಪಾಯವನ್ನು ಉಂಟುಮಾಡುವ ಮಾರಕ ದಾರವಾಗಿದೆ.
ಖರೀದಿ/ಮಾರಾಟ ನಿಷೇಧ: ಕರ್ನಾಟಕದಲ್ಲಿ ಚೈನೀಸ್ ಮಾಂಜಾವನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿದೆ. ಯಾರೂ ಇದನ್ನು ಖರೀದಿಸಬೇಡಿ ಮತ್ತು ಮಾರಾಟ ಮಾಡಬೇಡಿ.
ಸವಾರರ ಸುರಕ್ಷತೆ: ದ್ವಿಚಕ್ರ ವಾಹನ ಸವಾರರು ಕಡ್ಡಾಯವಾಗಿ ಹೆಲ್ಮೆಟ್, ಗ್ಲೌಸ್ (ಕೈಗವಸು) ಧರಿಸಿ ಹಾಗೂ ಕುತ್ತಿಗೆಯ ಭಾಗವನ್ನು ಬಟ್ಟೆಯಿಂದ ಮುಚ್ಚಿಕೊಂಡು ನಿಧಾನವಾಗಿ ಚಲಿಸಿ.
ನೈಸರ್ಗಿಕ ದಾರ ಬಳಸಿ: ಮಕ್ಕಳಿಗೆ ಗಾಳಿಪಟ ಹಾರಿಸಲು ಕೇವಲ ಸಾಂಪ್ರದಾಯಿಕ ಹತ್ತಿಯ (ಕಾಟನ್) ದಾರವನ್ನು ಮಾತ್ರ ನೀಡಿ.
ಸಮಯಕ್ಕೆ ಸರಿಯಾಗಿ ಸ್ಪಂದಿಸಿದ್ದರಿಂದ ಮಹಿಳೆಯ ಪ್ರಾಣ ಉಳಿದಿದ್ದು, ಪ್ರತಿಯೊಬ್ಬರೂ ಈ ಬಗ್ಗೆ ಜಾಗೃತರಾಗಿರಲು ಸಾರ್ವಜನಿಕರಲ್ಲಿ ಮನವಿ ಮಾಡಲಾಗಿದೆ.
ವರದಿ :- ಗಿಲ್ಬರ್ಟ್. ಜೆ
