ಹೈದರಾಬಾದ್: ಬಾರ್‌ನಲ್ಲಿ ಪಾವತಿಸಿದ ಬಿಲ್ ಹಣವನ್ನು ವಾಪಸ್ ನೀಡುವಂತೆ ಒತ್ತಾಯಿಸಿ, ಬೌನ್ಸರ್‌ಗಳು ಹಾಗೂ ಗ್ರಾಹಕರಿಗೆ ರಿವಾಲ್ವರ್ ತೋರಿಸಿ ಬೆದರಿಕೆ ಒಡ್ಡಿದ್ದ 24 ವರ್ಷದ ಯುವಕನನ್ನು ಪೊಲೀಸರು ವಶಕ್ಕೆ ಪಡೆದುಕೊಂಡಿದ್ದಾರೆ.
ಬಂಧಿತ ಆರೋಪಿಯನ್ನು ಮೊಹಮ್ಮದ್ ಶಾನವಾಜ್ (24) ಎಂದು ಗುರುತಿಸಲಾಗಿದ್ದು, ಈತನಿಂದ ಕೃತ್ಯಕ್ಕೆ ಬಳಸಿದ್ದ ರಿವಾಲ್ವರ್ ಹಾಗೂ ಮಹೀಂದ್ರಾ ಥಾರ್ (Mahindra Thar) ವಾಹನವನ್ನು ಪೊಲೀಸರು ಜಪ್ತಿ ಮಾಡಿದ್ದಾರೆ.
ಕಂಠಪೂರ್ತಿ ಕುಡಿದು ಗಲಾಟೆ: ಘಟನೆಯ ವಿವರ
ಹೈದರಾಬಾದ್‌ನ ಸೋಮಾಜಿಗುಡದಲ್ಲಿರುವ ‘ಹೆಡ್‌ಕ್ವಾರ್ಟರ್ಸ್‌ ಬಾರ್ ಆ್ಯಂಡ್‌ ರೆಸ್ಟೋರೆಂಟ್‌’ನಲ್ಲಿ ಮಧ್ಯರಾತ್ರಿ ಈ ಹೈಡ್ರಾಮಾ ನಡೆದಿದೆ. ಬಾರ್‌ನ ಎರಡನೇ ಮಹಡಿಯಲ್ಲಿ ಗ್ರಾಹಕರ ಎರಡು ಗುಂಪುಗಳ ನಡುವೆ ಕ್ಷುಲ್ಲಕ ಕಾರಣಕ್ಕೆ ತೀವ್ರ ವಾಗ್ವಾದ ಉಂಟಾಗಿತ್ತು. ಪರಿಸ್ಥಿತಿ ವಿಕೋಪಕ್ಕೆ ಹೋಗುವುದನ್ನು ತಡೆಯಲು ತಕ್ಷಣವೇ ಮಧ್ಯಪ್ರವೇಶಿಸಿದ ಬಾರ್ ಬೌನ್ಸರ್‌ಗಳು, ಗಲಾಟೆ ಮಾಡುತ್ತಿದ್ದ ಎರಡೂ ಗುಂಪುಗಳನ್ನು ಹೊರಗೆ ಕಳುಹಿಸಿದ್ದರು.
ಥಾರ್‌ನಿಂದ ರಿವಾಲ್ವರ್ ತಂದು ಲೈವ್ ಬೆದರಿಕೆ!
ಬೌನ್ಸರ್‌ಗಳು ಹೊರಹಾಕಿದ್ದರಿಂದ ತೀವ್ರ ಆಕ್ರೋಶಗೊಂಡ ಆರೋಪಿ ಶಾನವಾಜ್, ಕೆಳಗೆ ನಿಲ್ಲಿಸಿದ್ದ ತನ್ನ ಮಹೀಂದ್ರಾ ಥಾರ್ ವಾಹನದ ಬಳಿಗೆ ತೆರಳಿ ಒಳಗಿದ್ದ ರಿವಾಲ್ವರ್ ತೆಗೆದುಕೊಂಡು ಮತ್ತೆ ರೆಸ್ಟೋರೆಂಟ್‌ಗೆ ನುಗ್ಗಲು ಯತ್ನಿಸಿದ್ದಾನೆ.
ಆಗ ಬೌನ್ಸರ್‌ಗಳು ಆತನನ್ನು ತಡೆದಾಗ, ನೆಲಮಾಳಿಗೆಯ (Basement) ಬಳಿ ಗ್ರಾಹಕರು ಹಾಗೂ ಬೌನ್ಸರ್‌ಗಳತ್ತ ರಿವಾಲ್ವರ್ ಗುರಿಹಿಡಿದು, “ನಾನು ಪಾವತಿಸಿರುವ ಬಾರ್ ಬಿಲ್ ಹಣವನ್ನು ತಕ್ಷಣ ವಾಪಸ್ ನೀಡಬೇಕು, ಇಲ್ಲದಿದ್ದರೆ ಗುಂಡು ಹಾರಿಸಿ ಕೊಲ್ಲುತ್ತೇನೆ!” ಎಂದು ಬಹಿರಂಗವಾಗಿ ಬೆದರಿಕೆ ಹಾಕಿದ್ದಾನೆ.
ಪೊಲೀಸರ ಸಮಯೋಚಿತ ಕಾರ್ಯಾಚರಣೆ:
ಬಾರ್‌ನಲ್ಲಿ ಯುವಕ ಬಂದೂಕು ತೋರಿಸಿ ಬೆದರಿಕೆ ಹಾಕಿದ್ದನ್ನು ಕಂಡು ಆತಂಕಗೊಂಡ ಗ್ರಾಹಕರು ದಿಕ್ಕಾಪಾಲಾಗಿ ಓಡಿ, ತಕ್ಷಣವೇ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಸುಳಿವು ಸಿಗುತ್ತಿದ್ದಂತೆ ಸ್ಥಳಕ್ಕೆ ಧಾವಿಸಿದ ಪೊಲೀಸರು ಆರೋಪಿ ಮೊಹಮ್ಮದ್ ಶಾನವಾಜ್‌ನನ್ನು ವಶಕ್ಕೆ ಪಡೆದು, ಆತನ ಬಳಿಯಿದ್ದ ಗನ್ ಹಾಗೂ ಥಾರ್ ವಾಹನವನ್ನು ಠಾಣೆಗೆ ಕೊಂಡೊಯ್ದಿದ್ದಾರೆ.
ಘಟನೆಗೆ ಸಂಬಂಧಿಸಿದಂತೆ ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ಮುಂದಿನ ಕಾನೂನು ತನಿಖೆಯನ್ನು ಮುಂದುವರಿಸಿದ್ದಾರೆ.
