ಮಂಗಳೂರು: ತಮ್ಮ ಆಟೋದಲ್ಲಿ ಪ್ರಯಾಣಿಕರು ಮರೆತು ಹೋಗಿದ್ದ 48 ಗ್ರಾಂ ತೂಕದ ಚಿನ್ನದ ನೆಕ್ಲೇಸ್ ಒಳಗೊಂಡ ಬ್ಯಾಗ್ ಅನ್ನು ಸುರಕ್ಷಿತವಾಗಿ ವಾರಸುದಾರರಿಗೆ ಮರಳಿಸುವ ಮೂಲಕ ಮಂಗಳೂರಿನ ಆಟೋ ಚಾಲಕ ಬಸವರಾಜ್ ಅವರು ಸಮಾಜಕ್ಕೆ ಮಾದರಿಯಾಗಿದ್ದು, ಸಾರ್ವಜನಿಕ ವಲಯದಲ್ಲಿ ತೀವ್ರ ಮೆಚ್ಚುಗೆ ವ್ಯಕ್ತವಾಗಿದೆ.
ಘಟನೆಯ ವಿವರ:
ಮಂಗಳೂರಿನ ಅಫ್ಜಿಲಾ ಎಂಬ ಮಹಿಳೆ ಹೊಸದಾಗಿ 48 ಗ್ರಾಂ ತೂಕದ ಬಂಗಾರದ ನೆಕ್ಲೇಸ್ ಖರೀದಿಸಿ, ಬಸವರಾಜ್ ಅವರ ಆಟೋದಲ್ಲಿ ಪ್ರಯಾಣ ಬೆಳೆಸಿದ್ದರು. ತಲುಪಬೇಕಾದ ಸ್ಥಳಕ್ಕೆ ಬಂದಿಳಿಯುವ ಹಡಬಡಿಯಲ್ಲಿ, ಚಿನ್ನದ ನೆಕ್ಲೇಸ್ ಇದ್ದ ಬ್ಯಾಗ್ ಅನ್ನು ಆಟೋದಲ್ಲೇ ಮರೆತು ಹೋಗಿದ್ದರು.
ಬಿಕರಿಯಾಗಿದ್ದ ಲಕ್ಷಾಂತರ ರೂಪಾಯಿ ಮೌಲ್ಯದ ಬಂಗಾರ ಇದ್ದ ಬ್ಯಾಗ್ ತಮ್ಮ ಆಟೋದಲ್ಲಿ ಸಿಕ್ಕರೂ, ಯಾವುದೇ ದುರಾಶೆಗೆ ಒಳಗಾಗದ ಚಾಲಕ ಬಸವರಾಜ್ ಅವರು ತಕ್ಷಣವೇ ಮಂಗಳೂರು ನಗರ ಪೊಲೀಸರನ್ನು ಸಂಪರ್ಕಿಸಿದ್ದಾರೆ.
ಪೋಲಿಸರ ಸಮ್ಮುಖದಲ್ಲಿ ಹಸ್ತಾಂತರ:
ಪೋಲಿಸರ ಮಧ್ಯಸ್ಥಿಕೆ ಹಾಗೂ ಸಹಾಯದೊಂದಿಗೆ ಬ್ಯಾಗ್‌ನ ವಾರಸುದಾರರಾದ ಅಫ್ಜಿಲಾ ಅವರನ್ನು ಪತ್ತೆಹಚ್ಚಿ, ಅವರ 48 ಗ್ರಾಂ ಚಿನ್ನದ ನೆಕ್ಲೇಸ್ ಇದ್ದ ಬ್ಯಾಗ್ ಅನ್ನು ಯಥಾವತ್ತಾಗಿ ಹಸ್ತಾಂತರಿಸಲಾಗಿದೆ.
ತಮ್ಮ ಕಳೆದುಹೋದ ಚಿನ್ನದ ನೆಕ್ಲೇಸ್ ವಾಪಸ್ ಸಿಕ್ಕಿದ್ದಕ್ಕೆ ಅಫ್ಜಿಲಾ ಹಾಗೂ ಅವರ ಕುಟುಂಬಸ್ಥರು ನಿಟ್ಟುಸಿರು ಬಿಟ್ಟಿದ್ದು, ಚಾಲಕ ಬಸವರಾಜ್ ಅವರ ಈ ಪ್ರಾಮಾಣಿಕ ನಡೆಗೆ ಮಂಗಳೂರು ಪೊಲೀಸರು ಹಾಗೂ ನಾಗರಿಕರು ಮುಕ್ತಕಂಠದಿಂದ ಶ್ಲಾಘನೆ ವ್ಯಕ್ತಪಡಿಸಿದ್ದಾರೆ.
