ಕೋಲಾರ: ಅಸ್ಸಾಂ ಹಾಗೂ ಕೋಲ್ಕತ್ತಾದಿಂದ ಕರ್ನಾಟಕ ಮತ್ತು ನೆರೆರಾಜ್ಯಗಳಿಗೆ ಸಾಗಿಸಲಾಗುತ್ತಿದ್ದ ಬೃಹತ್ ಪ್ರಮಾಣದ ಅಸುರಕ್ಷಿತ ಹಾಗೂ ಕಳಪೆ ಗುಣಮಟ್ಟದ ಅಡಿಕೆ ಜಾಲವನ್ನು ಆಹಾರ ಸುರಕ್ಷತಾ ಮತ್ತು ಗುಣಮಟ್ಟ ಪ್ರಾಧಿಕಾರದ (FSSAI) ಅಧಿಕಾರಿಗಳು ಭೇದಿಸಿದ್ದಾರೆ. ಕೋಲಾರ ಜಿಲ್ಲೆಯ ಮುಳಬಾಗಿಲು ತಾಲೂಕಿನಲ್ಲಿ ದಾಳಿ ನಡೆಸಿರುವ ಅಧಿಕಾರಿಗಳು 174 ಚೀಲ ಅಡಿಕೆಯನ್ನು ವಶಪಡಿಸಿಕೊಂಡಿದ್ದಾರೆ.
ಘಟನೆಯ ಹಿನ್ನೆಲೆ:
ಸೆಪ್ಟೆಂಬರ್ 14ರ ರಾತ್ರಿ ಆಹಾರ ಸುರಕ್ಷತಾ ಅಧಿಕಾರಿಗಳು ಲಭಿಸಿದ ಮಾಹಿತಿ ಆಧರಿಸಿ ಮುಳಬಾಗಿಲು ತಾಲೂಕಿನಲ್ಲಿ ‘WB 17-4074’ ನೋಂದಣಿ ಸಂಖ್ಯೆಯ ವಾಹನವನ್ನು ತಡೆದು ತಪಾಸಣೆ ನಡೆಸಿದ್ದರು. ಈ ವೇಳೆ ವಾಹನದಲ್ಲಿ ಸೂಕ್ತ ದಾಖಲೆಗಳಿಲ್ಲದ 174 ಚೀಲ ಅಡಿಕೆ ಪತ್ತೆಯಾಗಿತ್ತು.
ಸರಕಿಗೆ ಸಂಬಂಧಿಸಿದಂತೆ ಯಾವುದೇ ಮಾಲೀಕತ್ವದ ಪತ್ರಗಳು, ಸಾರಿಗೆ ದಾಖಲೆಗಳು, FSSAI ಲೈಸೆನ್ಸ್ ಹಾಗೂ ಪ್ಯಾಕೇಜಿಂಗ್/ಲೇಬಲಿಂಗ್ ದಾಖಲೆಗಳಿರಲಿಲ್ಲ. ಅಧಿಕಾರಿಗಳು ತಪಾಸಣೆ ನಡೆಸುತ್ತಿದ್ದಂತೆ ವಾಹನದ ಚಾಲಕ ಸ್ಥಳದಿಂದ ಪರಾರಿಯಾಗಿದ್ದ.
ಲ್ಯಾಬ್ ಟೆಸ್ಟ್‌ನಲ್ಲಿ ಶಾಕಿಂಗ್ ರಿಸಲ್ಟ್!
ದಾಳಿ ವೇಳೆ ಸಂಗ್ರಹಿಸಲಾಗಿದ್ದ ಒಟ್ಟು 5 ಸ್ಯಾಂಪಲ್‌ಗಳನ್ನು (ಮಾದರಿಗಳು) ಪ್ರಯೋಗಾಲಯದ ಪರೀಕ್ಷೆಗೆ ಕಳುಹಿಸಲಾಗಿತ್ತು. ಪರೀಕ್ಷೆಯ ವರದಿಯಲ್ಲಿ ಅಡಿಕೆ ಮಾನವನ ಆರೋಗ್ಯಕ್ಕೆ ಅಸುರಕ್ಷಿತ (Unsafe) ಎಂಬುದು ಪತ್ತೆಯಾಗಿದೆ.
3 ಕಾನೂನು ಮಾದರಿಗಳ ಪೈಕಿ: 1 ಸ್ಯಾಂಪಲ್ ‘ಅಸುರಕ್ಷಿತ + ಕಳಪೆ ಗುಣಮಟ್ಟ’, 1 ಸ್ಯಾಂಪಲ್ ‘ಅಸುರಕ್ಷಿತ’ ಹಾಗೂ 1 ಸ್ಯಾಂಪಲ್ ‘ಕಳಪೆ ಗುಣಮಟ್ಟ’ದ್ದು ಎಂದು ದೃಢಪಟ್ಟಿದೆ.
2 ಸರ್ವೇ ಮಾದರಿಗಳ ಪೈಕಿ: 1 ಸ್ಯಾಂಪಲ್ ‘ಅಸುರಕ್ಷಿತ’ ಹಾಗೂ 1 ಸ್ಯಾಂಪಲ್ ಮಾತ್ರ ‘ಸುರಕ್ಷಿತ’ ಎಂದು ಬಂದಿದೆ.
ಪ್ರಸ್ತುತ ಅಸುರಕ್ಷಿತ ಪತ್ತೆಯಾದ ಲಾಟ್‌ನಿಂದ ಮತ್ತಷ್ಟು ಕಾನೂನು ಮಾದರಿಗಳನ್ನು ಸಂಗ್ರಹಿಸಿ ತನಿಖೆ ಮುಂದುವರಿಸಲಾಗಿದೆ.
ಎಲ್ಲೆಲ್ಲಿಗೆ ಸರಬರಾಜಾಗಬೇಕಿತ್ತು ಈ ಅಡಿಕೆ?:
ಅಸ್ಸಾಂ ಹಾಗೂ ಕೋಲ್ಕತ್ತಾದಿಂದ ತಂದಿದ್ದ ಈ ಕಳಪೆ/ಅಸುರಕ್ಷಿತ ಅಡಿಕೆಯನ್ನು ವಿವಿಧ ನಗರಗಳಿಗೆ ಹಂಚಲು ಸಂಚು ರೂಪಿಸಲಾಗಿತ್ತು:
ಬೆಂಗಳೂರು: 54 ಚೀಲ
ಕೋಲಾರ: 53 ಚೀಲ
ತಿರುಪತಿ: 20 ಚೀಲ
ಪುಂಗನೂರು: 15 ಚೀಲ
ಪಾಲಕ್ಕಾಡ್ (ಕೇರಳ): 12 ಚೀಲ
ಚೆನ್ನೈ: 10 ಚೀಲ
ವೇಪನಪಲ್ಲಿ (ತಮಿಳುನಾಡು): 10 ಚೀಲ
ಕಠಿಣ ಕಾನೂನು ಕ್ರಮ:
ವಶಪಡಿಸಿಕೊಂಡ ಎಲ್ಲಾ 174 ಅಡಿಕೆ ಚೀಲಗಳನ್ನು ಕೋಲಾರ ಜಿಲ್ಲಾ ಕೇಂದ್ರದ ಆಹಾರ ಮತ್ತು ನಾಗರಿಕ ಸರಬರಾಜು ಸಗಟು ಗೋದಾಮಿಗೆ ಸ್ಥಳಾಂತರಿಸಿ ಜಪ್ತಿ ಮಾಡಲಾಗಿದೆ.
ಸಂಬಂಧಪಟ್ಟ ವ್ಯಾಪಾರಿಗಳಿಗೆ ನೋಟಿಸ್ ಮತ್ತು ಸಮನ್ಸ್ ಜಾರಿ ಮಾಡಲಾಗಿದ್ದು, ಆಹಾರ ಸುರಕ್ಷತಾ ಕಾಯ್ದೆಯ (FSS Act) ಸೆಕ್ಷನ್ 51 ಮತ್ತು 59ರ ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ. ಪ್ರಕರಣದ ಮುಂದಿನ ವಿಚಾರಣೆಯನ್ನು ಜೆಎಂಎಫ್‌ಸಿ (JMFC) ಕೋರ್ಟ್ ಹಾಗೂ ಅಡ್ಜುಡಿಕೇಟಿಂಗ್ ಆಫೀಸರ್ ಮುಂದೆ ಕೊಂಡೊಯ್ಯಲಾಗುತ್ತಿದೆ.
